Клубот на одговорни бизниси на Конект, во партнерство со Министерството за економија и труд на Р.С. Македонија, со поддршка на Фондот за население на ОН (UNFPA) и Австриската агенција за развој (АДА), ги додели наградите „Предводници на одржливиот развој“ на 8 јуни 2026 година во Клубот на пратеници во присуство на над 100 претставници од бизнис секторот, институциите и граѓанските организации.
Во рамки на Бизнис форумот за одржливост, наградата за родово-одговорни семејни политики за мали и средни претпријатија беше доделена на Фармахем. Ова значајно признание претставува потврда за нашата континуирана посветеност кон создавање инклузивна, правична и поддржувачка работна средина. Низ практики како флексибилни работни аранжмани, еднакви можности за развој и напредување, правична плата, грижа за благосостојбата на вработените и бројни други иницијативи коишто ги надминуваат законските стандарди, активно придонесуваме кон подобар квалитет на живот и одржлив развој.
Исто така, повелбата „Горан Лазаревски“ за заслуги во одржливиот развој беше доделена на извршната директорка на Фармахем, г-ѓа Марјонка Велјановска, како признание за нејзиниот исклучителен професионален придонес во унапредувањето на одржливите и општествено одговорни практики во Македонија. Првата награда за Општествена одговорност за Фармахем во 2008 година ни беше врачена токму од почитуваниот г-н Горан Лазаревски како прв претседател на УО на Конект, врвен професионалец кој го поддржуваше бизнисот и граѓанското општество. За нас ова претставува голема чест и признание во негово сеќавање.
Упатуваме искрена благодарност до организаторите на Бизнис форумот за одржливост за продолжувањето на овие значајни награди, како и честитки до сите компании и поединци кои беа препознаени за своите достигнувања во областа на одржливоста.
Заедно продолжуваме да го градиме патот кон поодржливо, поправедно и поодговорно општество за сегашните и идните генерации.
